Skálarnir /
Þönglabakki
 Þönglabakki
Vetur 3.000kr. Nóttin á mann
Sumar 3.000kr. Nóttin á mann
Síðustu ábúendur fluttu frá Þönglabakka vorið 1944. Fljótlega eftir það var baðstofan sem eftir stóð útbúin sem afdrep skipbrotsmanna. Tíu árum seinna var hún ónýt og var þá ráðist í að byggja nýtt skipbrotsmannaskýli. Fyrir því stóð Slysavarnarfélagið Ægir á Grenivík. Húsið var byggt á níu dögum í tveimur áföngum vor og haust 1955.
Byggingarkostnaður var 55 þúsund krónur. Hann fékkst allur með frjálsum samskotum auk framlags Slysavarnarfélags Íslands.
Aldrei hafa neinir skipbrotsmenn komið í þennan skála. Aftur á móti hafa gangnamenn gist þar í haustgöngum og göngumenn og hestamenn hafa átt þar víst skjól.
Þótt ekki væri búið að ganga formlega frá eigendaskiptum á húsunum tók Ferðafélagið Fjörðungur strax til óspilltra málanna sumarið 2006 og byggði sólpall kringum Þönglabakkaskálann með tilstyrk Gýtubakkahrepps. Pallurinn gjörbreytti allri aðstöðu þar.
Í næstu lotu var farið í ársbyrjun 2008. Gólfið var orðið fúið og brýnt að skipta um það. Niðurstaðan varð sú að allt var hreinsað innan úr húsinu, sett nýtt gólf, veggir og loft panelklætt, settar nýjar innréttingar og nýjar, tvíbreiðar kojur. Gluggar voru og endurnýjaðir.
Efnið var flutt á staðinn á snjótroðurum og allt verkið framkvæmt í níu vélsleðaferðum í febrúar til maí 2008. Þar komu 58 manns við sögu og skiluðu 730 vinnustundum, hér um bil öllum í sjálfboðavinnu.
Á Þönglabakka er nú svefnpláss fyrir 16 manns. Í húsinu er nýr olíuofn til upphitunar, gas til að sjóða á og borðbúnaður fyrir 20 manns. Úti er gott kolagrill.
Við skálann stendur náðhús með þvottavaska öðrum megin og vatnssalerni hinum megin.
Prentvæn
útgáfa
|
